काठमाडाैं । धार्मिक, पर्यटकीय र ऐतिहासिक महत्व बोकेको चन्द्रागिरि नगरपालिकामा आजबाट ‘चन्द्रागिरि महोत्सव’ सुरू भएको छ । महोत्सव वैशाख ७ गतेसम्म संचालन हुने  चन्द्रागिरि नगरपालिकाले जनाएकाे छ ।

चन्द्रागिरि नगरपालिकाको आयोजना तथा प्रदेश नं ३ सरकार, जिल्ला विकास समन्वय समिति काठमाडौंको सह–आयोजनामा महोत्सव हुन लागेकाे हाे । ‘चन्द्रागिरिको सर्वाङ्गीण विकास र जगेर्ना गरौँ, कला, संस्कृति र प्राकृतिक सौन्दर्यताले चन्द्रागिरिको पहिचान बढाऔँ, भन्ने मूल नाराका साथ दोस्रोपटक महोत्सव हुन लागेको हो ।

महोत्सव चन्द्रागिरि नगरपालिका–१२ गुर्जुधारामा हुनेछ । पर्यटकीय स्थल चन्द्रागिरिलाई स्थानीय कला, संस्कृति, प्राकृतिक स्रोत र साधन, साँस्कृतिक सम्पदा, पहिचान, चन्द्रागिरिका ऐतिहासिक विषयवस्तु, उत्पादन तथा अन्य विषयलाई मूर्तरुपमा पहिचान गराउने उद्देश्यले महोत्सव आयोजना गर्न लागिएको चन्द्रागिरि नगरपालिका प्रवक्ता हरिभक्त महर्जनले जानकारी दिनुभएकाे छ ।

नौ दिनसम्म चल्ने उक्त महोत्सवमा स्थानीय कृषि उपज, घरेलु तथा हस्तकला, साना उद्योग, अटो इन्जिन, अटो मोबाइल, स्थानीय कला संस्कृति, स्थानीय काष्ठकला, स्थानीय खानाका परिकार, सूचना प्रविधि, स्वास्थ्य, शिक्षा, स्वरोजगार फाराम संकलनगायतका एक सय बढी कक्ष रहने आयोजकले जनाएको छ । पछिल्लो समय दहचोक, कालुपाण्डे समाधि स्थल, मातातीर्थ, थानकोट, मच्छेनारायण जस्ता पर्यटकीय तथा धार्मिक स्थल रहेको पर्यटकीय स्थललाई प्रदेश सरकारले पर्यटकीय गन्तव्यको रुपमा विकास गर्दै लगेको छ ।

सम्बन्धित खवर

Stay Connected

Advertisement